ArmStyle

«Ուրիշի փոխարեն» նոր հայկական ռոմանտիկ կատակերգությունը, որտեղ հանդես են գալիս երիտասարդ, սակայն արդեն հայտնի դերասաններ, մեծ էկրան կբարձրանա նոյեմբերի 6-ին:

Այս մասին ֆիլմի ստեղծողները տեղեկացրել են Facebook-ում ֆիլմի պաշտոնական էջում: Կինոնկարի սյուժեն վերցված է ժամանակակից առօրյա կյանքից:

Գլխավոր հերոսը` Արսենը, ում կերպարը մարմնավորել է հայտնի դերասան Սոս Ջանիբեկյանը, պլաստիկ վիրաբույժ է և բնակվում է ԱՄՆ-ում: Երիտասարդ բժիշկի ընտանիքը տեղափոխվել է Ամերիկա, երբ նա դեռ փոքր էր:

Կրթություն ստանալով Նահանգներում` Արսենն ավելի շատ ամերիկյան արժեքների կրող է: Օրինապահ երիտասարդը անգամ չէր կարող պատկերացնել, որ իր պատմական հայրենիքում կարող է ներքաշվել հանցագործության մեջ և օգնել հանցագործին ներկայանալ «ուրիշի փոխարեն»:

Ֆիլմում հայտնի հայ կատակերգու Հովհաննես Ազոյանը հանդիսատեսի առջև կներկայանա ամբողջովին նոր` բացասական կերպարով և անգամ մի փոքր կփոխի իմիջը…

Ֆիլմի ռեժիսորը Հրանտ Երիցկանյանն է, սցենարիստները` Աշոտ Աբրահամյանն ու Սարգիս Մնոյանը:

Ֆիլմում նկարահանվել են Սոս Ջանիբեկյանը, Թամարա Պետրոսյանը, Հովհաննես Ազոյանը, Վահագն Գալստյանը, Սաթի Ջանիբեկյանը, Արամոն, Լևոն Հարությունյանը, Ալինա Մարտիրոսյանն ու այլ սիրված դերասաններ:

Ֆիլմը կցուցադրվի Երևանի բոլոր կինոթատրոններում նոյեմբերի 6-ից:-0-